Бу йилги мавзу – “Инқирозларни бошқариш: муваффақиятлар асосини яратиш”.

2025 йилги тадбирларда Осиё-Тинч океани минтақасининг молиявий ва академик доираларидан 200 дан зиёд ривожланиш бўйича халқаро экспертлар иштирок этди. Тадбирларда Ўзбекистон Республикаси Ҳисоб палатаси шўъба мудири Ш. Маматкулов ҳам қатнашди.

Осиё баҳолаш ҳафталиги ўзининг 10-йиллик тарихи давомида билим ва ҳамкорликни ривожлантириш учун долзарб ва самарали форум сифатида хизмат қилмоқда.  

2025-йилги Осиё баҳолаш ҳафталиги доирасида кўплаб долзарб йўналишларда тематик сессиялар бўлиб ўтди: 

1) Инклюзивлик; 

2) Технология ва инновациялар; 

3) Иқлим ўзгариши; 

4) Бошқарув ва мамлакатни баҳолаш тизимлари; 

5) Хусусий секторда баҳолашнинг роли.

Ҳафталикда ушбу соҳаларда миллий салоҳиятни ошириш бўйича Осиё ҳукуматлари ва БМТ агентликлари (Тараққиёт дастури, ЮНИСЕФ, БМТ Аҳолишунослик жамғармаси) вакиллари томонидан муҳокамалар ташкил этилди.

Тадбирлар доирасида қарорлар қабул қилиш самарадорлигини ошириш бўйича Иқтисодий ҳамкорлик ва тараққиёт ташкилоти, Европа тикланиш ва тараққиёт банки Европа инвестиция банки, Осиё инфратузилма инвестиция банкининг мослашувчан стратегиялари ва инновациялари ўрганилди.

Шу билан бирга, иштирокчилар Хитойнинг “яшашга яроқли шаҳарлар” лойиҳалари самарадорлигини бошқариш ва баҳолаш соҳасидаги амалий тажрибаси билан танишди.

2025-йилги Осиё баҳолаш ҳафталиги кўплаб халқаро ва миллий экспертларни бирлаштирган тажриба алмашиш платформаси сифатида ўз ишини якунлади.