Унда Давлат молиявий назорат инспекцияси ва давлат ташкилотлари ички аудит хизматларининг 250 га яқин ходимлари иштирок этди.

Семинарда Ҳисоб палатаси раиси ўринбосари С. Мирзаев Вазирлар Маҳкамасининг 2025 йил 16 июлдаги 446-сонли қарори билан тасдиқланган “2025 — 2027 йилларда республика ва маҳаллий ижро этувчи ҳокимият органларида ички назорат тизимини янада такомиллаштириш концепцияси” асосида республика ва маҳаллий ижро этувчи ҳокимият органларида самарали ички назорат тизимини жорий этиш масаласини таъкидлади. 

С. Мирзаев келгусида ички аудит бўйича халқаро сертификатлаш тизимини йўлга қўйиш, ички аудит хизматлари ОАВда ўз фаолиятига оид ҳисоботларни жамоатчиликка эълон қилиб бориши ҳамда фуқаролар иштирокидаги аудитни кенгайтириш каби долзарб масалалар юзасидан ҳам фикр билдирди.   

Шунингдек, Ҳисоб палатасининг масъул ходимлари томонидан давлат молиявий назорат органлари ва ички аудит хизматлари фаолияти самарадорлигини ошириш тўғрисида тақдимот қилинди.

Шу билан бирга, масъуллар томонидан “Давлат аудити” ахборот тизимидан фойдаланиш ҳолати ва уни янада такомиллаштириш бўйича амалга оширилаётган ишлар тўғрисида тушунтиришлар берилди.

Семинар интерактив мулоқот форматида ташкил этилди.

Фаолиятга оид юзага келаётган муаммолар бўйича томонларни қизиқтирган савол ва амалий таклифлар эшитилди. 

Қайд этилган муаммоларнинг ечимлари юзасидан Ҳисоб палатасининг масъул ходимлари тегишли тавсия ва кўрсатмалар берди.