O‘quv tadbirlari oliy audit organlarida risklarni boshqarish tizimini takomillashtirish, audit jarayonlarida zamonaviy yondashuvlarni joriy etish hamda xalqaro tajribani o‘rganishga qaratildi.

Dastur doirasida Turkiya Hisob sudining Auditni rejalashtirish va hisobotlar departamenti rahbari, doktor Ahmet Taner hamda bosh auditor Mine Chakir tomonidan ma’ruzalar taqdim etildi.

Xususan, mashg‘ulotlar davomida quyidagi mavzularga urg‘u berildi:

- Oliy audit organlarida risklarni boshqarishning nazariy asoslari;

- Risklarni boshqarish va ichki nazorat tizimi;

- Risklarni boshqarishni auditni rejalashtirish jarayoniga integratsiya qilish;

- Strategik rejalashtirish va tashkiliy darajada auditni rejalashtirish;

- Qayta ko‘rib chiqilgan ISSAI 140 audit standarti asosida sifatni boshqarish va risk-tahlil;

- Turkiya Hisob sudi amaliyotida risklarni boshqarish bo‘yicha ilg‘or tajribalar.

Shuningdek, o‘quv treninglari doirasida ishtirokchilar bilan interaktiv muloqot o‘tkazilib, risklarni boshqarish sohasida to‘plangan amaliy tajriba, mavjud muammolar hamda kelgusidagi ustuvor yo‘nalishlar muhokama qilindi.

3 kun davom etgan onlayn o‘quv treninglari yakunida ishtirokchilar oliy audit organlari faoliyatida risk-tahlil yondashuvlarini joriy etish, audit sifati va samaradorligini oshirish hamda xalqaro standartlar asosida boshqaruv tizimini takomillashtirish bo‘yicha yangi amaliy ko‘nikmalarga ega bo‘ldilar.