Hisob palatasida OTBning O‘zbekiston bo‘yicha operasion faoliyat rahbari M. G‘ulomov boshchiligidagi ekspertlar guruhi bilan uchrashuv bo‘lib o‘tdi.

Unda tomonlar O‘zbekistonda davlat moliyaviy nazorat tizimini takomillashtirish doirasida o‘zaro hamqorlik aloqalarini rivojlantrishi yuzasidan muhokamalar o‘tkazdi.

Uchrashuvda Hisob palatasi raisining birinchi o‘rinbosari M. Abdullaev ushbu idoradagi transformasion jarayonlar hamda istiqboldagi rejalar yuzasidan ma'lumot berdi. Avvalgi moliyaviy tekshirishlardan ilg‘or xalqaro standartlar asosida audit o‘tkazishga o‘tilgani ta'kidlandi. Hisob palatasi hozirda professional xulosa beruvchi tashkilotga aylandi.

Xalqaro tajriba asosida auditning samaradorlik, muvofiqlik, moliyaviy, strategik va IT standartlari hamda ularni o‘tkazish qo‘llanmalari ishlab chiqilib, 35 ta idoraviy va normativ-huquqiy hujjatlar qabul qilindi.

Qolaversa, kuni kecha Hisob palatasi OTB bilan hamkorlikda mamlakatimizda amalga oshirilayotgan muhim loyihalardan birini “pilot” tajriba tariqasida auditan o‘tkazdi.

Uchrashuv yakunida davlat moliyaviy nazorat tizimini takomillashtirish, jumladan, tashqi audit jarayonini raqamlashtirish hamda kadrlar salohiyatini oshirish yuzasidan OTB va Hisob palatasi o‘rtasidagi o‘zaro hamkorlikni yanada mustahkamlanishiga kelishildi.