Танлов аудит, маълумотлар таҳлили (Data Analytics), IT ва Big Data йўналишлари бўйича ўтказилмоқда. Номзодлардан бюджет харажатлари ва молиявий ҳисоботларни таҳлил қилиш, хатарларни аниқлаш, катта ҳажмдаги маълумотлар билан ишлаш, Python, SQL ва ETL/ELT каби технологияларни қўллаш бўйича тегишли касбий билим ва тажриба талаб этилди.

Шунингдек, номзодлар ўз касбий салоҳиятини фақат резюме билан эмас, балки бажарган ишлари ва амалга оширилган лойиҳалари орқали ҳам тасдиқлашлари лозим эди.

Тақдим этилган аризалар эълон қилинган талабларга мувофиқлиги бўйича дастлабки ўрганишдан сўнг, белгиланган мезонларга жавоб берадиган номзодлар суҳбат босқичига ўтмоқда.

Кейинги босқичда номзодларнинг касбий билимлари, таҳлилий фикрлаши ва ўз йўналишига оид вазифаларни ҳал этишдаги амалий ёндашуви баҳоланади.

Давлат аудитида маълумотлар таҳлили, рақамли воситалар ва хатарларга асосланган ёндашувлар тобора кенг қўлланилаётган шароитда ушбу йўналишларда фаолият юритадиган мутахассисларнинг касбий салоҳияти алоҳида аҳамият касб этади.

Ҳисоб палатасида танлов жараёни эълон қилинган талаблар ва белгиланган босқичлар асосида давом эттирилади.