Табрикномада Палатанинг миллий аудит тизимини ривожлантириш ва малакали кадрларни тайёрлашдаги муҳим ўрни алоҳида таъкидланди.

Чорак аср давомида Аудиторлар палатаси юзлаб малакали мутахассисларни бирлаштира олди, замонавий касбий мактабни шакллантирди ва хусусий секторда ташқи аудитни ривожлантиришга салмоқли ҳисса қўшди.

Айниқса, аудиторларни сертификатлаштириш ва уларнинг малакасини ошириш тизимини такомиллаштириш бўйича эришилган натижалар эътироф этилди.

Табрикномада давлат аудитининг олий органи бўлган Ҳисоб палатаси ҳамда мустақил аудит институти сифатидаги Аудиторлар палатаси бир-бирини тўлдирувчи тузилмалар ҳисобланиши қайд этилди.

Улар ўртасидаги ҳамкорликнинг изчил мустаҳкамланиб бориши мамлакатнинг молиявий шаффофлигини оширишга ва жамоатчилик ишончини кучайтиришга хизмат қилмоқда.

Конференция иштирокчиларига мурожаат этар экан, Ҳисоб палатаси вакиллари халқаро форум доирасидаги муҳокамалар ва эксперт таҳлиллари Ўзбекистонда аудит соҳасининг институционал ва ҳуқуқий асосларини янада мустаҳкамлашга қаратилган янги ғоя ва таклифлар учун асос бўлишини билдирдилар.

Табрикнома якунланар экан, Ҳисоб палатаси Аудиторлар палатасининг барча аъзоларини ушбу қутлуғ сана билан табриклаб, уларга мустаҳкам соғлиқ, фаровонлик ва касбий фаолиятларида янги муваффақиятлар тилади.