Унда, аудит бошқарув тизими билан боғлиқ 4 та долзарб мавзулар бўйича ўқув тренинглар ташкил этилди. Тренингда Туркия Ҳисоб судининг тажрибали аудиторлари томонидан молиявий ҳамда мувофиқлик аудитлари бўйича амалий машғулотлар ўтказилди.

Туркия Ҳисоб судининг “VERA” маълумотларни таҳлил қилиш электрон ахборот тизими ҳамда ушбу дастур орқали рискларни аниқлаш ва аудитда сунъий интеллект ёндашуви бўйича Туркия тажрибаси ўрганилди.

Шунингдек, ўқув тренинг давомида давлат-хусусий шериклик асосида амалга ошириладиган йирик лойиҳаларни (пуллик автомобиль йўллари, тиббиёт муассасалари, кўприклар ҳамда бошқа объектлар) молиялаштириш ҳамда унда давлатнинг иштироки, ушбу объектларни аудитдан ўтказиш тартиблари бўйича назарий ва амалий тушунчалар берилди.

Шу билан бирга, ҳар бир маърузадан сўнг аудит жараёнларини ташкил этиш, уларни ўтказиш ва ҳисоботлар тайёрлаш бўйича бир қатор тавсиялар ҳамда аудит жараёнида юзага келадиган қийинчиликларни бартараф этиш масалалари бўйича илмий-амалий муҳокамалар ўтказилди.

Ўқув тренинг якуни бўйича Ўзбекистон Ҳисоб палатаси аудиторларига сертификатлар топширилди. Келгусида ҳам Ўзбекистон-Туркия Олий аудит органлари ўртасида тажриба алмашиш ҳамда мутахассислар малакасини ошириш бўйича тизимли ҳамкорлик давом эттирилишига келишиб олинди.