Россия Федерацияси Ҳисоб палатаси асос солинганининг 30-йиллигига бағишланган тадбирлар

Москва шаҳрида Россия Федерацияси Ҳисоб палатаси асос солинганининг 30-йиллигига бағишланган тантанали тадбирлар бўлиб ўтди. Ушбу тадбирларда Ўзбекистон Республикаси Ҳисоб палатаси раиси ўринбосари Сардор Мирзаев бошчилигидаги делегация иштирок этди.

Маълумот ўрнида: Россия Федерацияси Ҳисоб палатаси – Конституцияга мувофиқ тузилган Федерал Мажлис (Парламент)га ҳисобдор бўлган давлатнинг Олий аудит органи. Асосий вазифаси – федерал бюджет маблағларидан мақсадли ва самарали фойдаланиш устидан назорат қилиш.

Шу муносабат билан, Россия Федерацияси Ҳисоб палатасининг кенгайтирилган йиғилиши бўлиб ўтди. Йиғилишда ушбу идора томонидан 2024 йил давомида амалга оширилган аудит тадбирлари ва уларнинг натижалари юзасидан маълумот берилди.

Москвага ташриф давомида С. Мирзаевнинг Россия Федерацияси Ҳисоб палатаси раиси ўринбосари Г. Изотова билан икки томонлама амалий учрашуви ўтказалди. Учрашувда томонлар идоралараро ҳамкорликнинг асосий натижаларини муҳокама қилиб, келгусидаги ҳамкорликнинг устувор йўналишларини белгилаб олдилар.

Шу билан бирга, Ўзбекистон Республикаси Ҳисоб палатаси делегациясининг МДҲ га аъзо мамлакатлар Олий аудит органлари делегациялари раҳбарлари билан учрашувлари кун тартибидан ўрин олди.

Хусусан, Қозоғистон, Қирғизистон, Озарбайжон ва Беларус Олий аудит органлари билан икки томонламан ва халқаро тузилмалар (ИНТОСАИ, АЗОСАИ, ЭКОСАИ ва МДҲ) доирасидаги ҳамкорлик юзасидан муҳокамалар бўлиб ўтди. 

Томонлар кадрлар салоҳиятини ошириш, халқаро аудит стандартларини жорий қилиш, қўшма аудит лойиҳаларида иштирок этиш, ўрта муддатли стратегияни ишлаб чиқиш жараёнида тажриба алмашиш бўйича келишувларга эришдилар. 

Ҳамкорлар келажакда ҳам ўзаро мулоқотни жадаллаштиришга келишиб олдилар.