2025 йил учун Давлат Бюджети тўғрисидаги Қонун лойиҳаси бўйича Ҳисоб палатасининг хулосаси

Ўзбекистон Республикасининг Бюджет кодекси ва “Ўзбекистон Республикасининг Ҳисоб палатаси тўғрисида”ги Қонунига мувофиқ, Ҳисоб палатаси томонидан “2025 йил учун Ўзбекистон Республикаси Давлат бюджети тўғрисида”ги Қонун лойиҳаси экспертизаси ва 2025 йил учун Бюджетнома таҳлили амалга оширилди.

Қонун лойиҳаcи ва Бюджетномада “Ўзбекистон – 2030” стратегиясидан келиб чиқиб, узоқ муддатли барқарор иқтисодий ўсишни таъминлаш учун ўрта ва узоқ муддатдаги асосий мақсадлар белгиланган.

Жумладан, консолидациялашган бюджет тақчиллигининг чекланган миқдори ялпи ички маҳсулотнинг 3 фоизи миқдорида белгиланган.

Ҳисоб палатаси томонидан Қонун лойиҳаcи ва Бюджетнома бўйича хулоса тайёрланди. Хулосани тайёрлаш жараёнида Давлат бюджети ва давлат мақсадли жамғармалари бюджетлари, шунингдек, солиқ ва бюджет сиёсатининг асосий йўналишлари лойиҳаларининг мамлакатни ижтимоий-иқтисодий ривожлантиришнинг устувор йўналишлари, соҳалар бўйича мақсадлари, вазифалари ҳамда Ўзбекистон Республикаси Президентининг қарорлари ва топшириқларига мувофиқлиги ўрганиб чиқилди. 

Хулосада қонун лойиҳаси ва бюджет-солиқ сиёсатининг асосий йўналишлари бўйича Ҳисоб палатаси томонидан жами 86 та таклиф ва тавсиялар берилди. 

 

Жумладан, Ҳисоб палатасининг таклифлари асосида даромадлар прогнозини 2,9 трлн сўмга ошириш бўйича қайта ҳисоб-китоб қилинди, айрим тадбирлар учун режалаштирилган харажатлар ҳажми 1,7 трлн сўмга мақбуллаштирилиб, бошқа муҳим масалаларга қайта йўналтирилди.

Маълумот ўрнида: Ўзбекистон Республикаси Президентининг 2024 йил 10 июлдаги ПФ-100 сонли Фармони билан Ҳисоб палатасига Ўзбекистон Республикасининг консолидациялашган бюджети ижросини ташқи аудитдан ўтказиш ва натижаси бўйича тегишли хулосаларни тайёрлаш вазифаси юклатилган.

Шундан келиб чиқиб, консолидациялашган бюджетни таркиби ҳисобланган ташқи қарз ҳисобига амалга оширилаётган лойиҳаларни молиялаштириш жараёнларини Ғазначилик билан қамраб олиш мақсадга мувофиқлиги билдирилди.