Сеулда “иқлим мақсадларига эришиш” мавзусида халқаро конференция бўлиб ўтди
Осиё тараққиёт банки ҳамда Корея Республикасининг Билим ва электрон Осиё ҳамкорлик жамғармаси (e-Asia) ҳамкорлигида Сеул шаҳрида “Иқлим мақсадларига эришиш – ҳисобдорлик ва шаффофлик” мавзусида халқаро конференция бўлиб ўтди. Унда Ўзбекистон Республикаси Ҳисоб палатаси шўъба мудирлари С. Наджимитдинов ва Р. Зияевлар иштирок этди.
Конференцияда БМТ, Жаҳон банки, ИҲТТ, ОТБ, Олий аудит органлари халқаро ташкилоти (ИНТОСAИ), Канаданинг академик доиралари вакиллари ҳамда 10 дан ортиқ мамлакат Олий молиявий назорат органлари аудиторлари қатнашди.
Тадбир доирасида давлат бошқаруви, аудит жараёнининг шаффофлиги, Олий аудит органларини рақамли қўллаб-қувватлаш ва иқлимга доир масалалар аудити мавзуларида панел сессиялари ва интерактив гуруҳ муҳокамалари ўтказилди.
Иқлим аудитида сунъий интеллект ва “катта маълумотлар”дан фойдаланиш, иқлим муаммоларини ҳал қилишда хусусий секторнинг ролига алоҳида эътибор қаратилди.
Ўзбекистон делегацияси, шунингдек, Олий аудит органларининг иқлим соҳасидаги масъулиятини ошириш, иқлим аудити бўйича самарали стратегияларни ишлаб чиқиш, техник экспертиза яратиш масалаларига бағишланган сессияда иштирок этди.
Жаҳон банки ва ИҲТТ иштирокида ОТБга аъзо бўлган ривожланаётган мамлакатлар вакиллари томонидан тақдимотлар ўтказилди. Бу Ўзбекистон Ҳисоб палатаси учун иқлим аудити кун тартибини ишлаб чиқишда амалий аҳамият касб этди.
Шу билан бирга, С. Наджимитдинов мамлакатимизда давлат молиявий назорати соҳасида амалга оширилаётган ислоҳотлар ҳақида тақдимот қилди. Ўзбекистон Республикаси Президентининг “2030 йилгача бўлган даврда Ўзбекистон Республикасининг Атроф муҳитни муҳофаза қилиш концепциясини тасдиқлаш тўғрисида”ги Фармони, “Яшил макон” миллий лойиҳасининг ижроси, шунингдек, Ҳукумат томонидан Орол инқирози оқибатларини юмшатишга қаратилган чора-тадбирлар ҳақида атрофлича маълумотлар берилди.
Ташриф доирасида “Самсунг инновациялар музейи” ва Сеул яқинидаги Сихва кўлида жойлашган дунёдаги энг йирик тўлқинли электр станциясига саёҳат уюштирилди.
Ўзбекистон Ҳисоб палатаси делегациясининг Корея Республикасига ташрифи Олий аудит органларининг иқлим мақсадларига эришишдаги иштироки борасида янги билим ва кўникмаларга эга бўлиш имконини берди.
8 Ноябр 2024
Воқеалар
Воқеалар тақвими
| Дш | Сш | Чш | Пш | Жм | Шн | Як |
Фотогалерея
